هو احنا امتي كبرنا
بعد ما ابتديت احط رجلي علي الارض
اصلي كنت زمان عايشه في البلالا لاند
مكنتش عارفه يعني ايه واقع اصلا
كنت فاكره الدنيا الوان
وان صحابي عندهم بابا وماما زي بتوعي
وان لو ارتبطت بحد حيبقي زي بابا
وان صحابي حيفضلوا معايا
واذ فجاه الدنيا قررت تقولي ان ده في احلامي بس
فالدنيا والقدر ابتدوا يوروني وش الواقع
وابتديت اشوف كل حاجه علي حقيقتها
حقيقه مكنتش شايفاها من كتر ماكنت عايشه فعالم مثالي بتاعي
بفتح شباكي واشوف الدنيا بعيني
عيني اللي ماشفتش وحش من امي وابويا
عيني اللي شافت معاهم دنيا جميله بعيدة عن دنيا القبيحه
دايما بنقول ان مفيش حد وحش
بس لما نيجي عند الدنيا نلاقيها وحشه اوي
وفجاة جت فدماغي اغنيه فريد الاطرش الحياة حلوة
واعلان فتافيت الحياة حلوة
لو الواحد خد معاني الكلام وفهمه
ان الدنيا هي دنيا والحياة حياة
الدنيا دي محطه لدنيا اكبر
وان كل اللي بيحصل فيها عشان نقوي ونحب حياتنا اكتر
يمكن جيلنا شاف اللي خلي الشعر الابيض يبان في عز شبابنا
اتحط فمواقف كبرته بزيادة قبل الاوان
ويمكن ده الاوان محدش يعرف
يمكن ده اوان الاختبار
اختبار النفوس و الفلوس والصحه والنفوذ
اختبار الصدمات
صدمه تحول النفوس و فقدان العزيز وضياع الحلم مع فقدان الامل من المحاوله تاني وتالت
الواحد من كتر الصدمات بقي مشروخ
جواه اهات وتكسير ومش عارف ينطق ويقول
بقي عايش ومش عايش
جيلنا علي قد ما في زمن حديث فيه مليون طريقه تواصل لكنه عايش سجين معزول
ايوه سجين شاشه عشان بقي يخاف يقول
اصله لو قال اللي جواه محدش حيفهم وحيقولوا عليه مجنون
وماله الجنون في زمن تاهت فيه العقول
ياريتنا فضلنا صغيرين ولاكبرناش
بس دي رحله ولازم تتعاش
لازم كل واحد فينا يدور علي مكان يحس فيه بالحياة
يدور علي ناس تشوف ملامحه وتحفظها
مش ناس تشوف كلامه ايه وتدوس لايك عليه
ناس تسمع صوته ونبره وانين قلبه الموجوع
ناس تطبطب عليه وتفضل حواليه
مش ناس تبعتله برقيه من كلمتين واهو بكده عمل اللي عليه
الحياة قصيرة ومش مستاهله كل التلج ده
لما الواحد بيعيش وسط ناس بيحبها وفجاة عزيزه بيتاخد منه
ساعتها بيعرف ان مفيش حاجه تستاهل
وان الحياة قصيرة عشان تتعاش فخناق وشد وجذب وخيانه وقله اهتمام و الحب اصبح كلمه مش فعل
الواحد لازم يدور علي اللي بيحبه ويعمله
يدور علي ناس بيحب يبقي معاهم
يدور علي حياته اللي تاهت منه وسط الزحام
يدور علي نفسه اللي راحت بين مين قال ومين عاد
يدور علي روحه اللي قعدت تنادي عليه عشان يرجع لغايه مصوتها اتنبح وانجرح
يدور عليه من تاني و يطبطب علي نفسه و يداوي روحه من تاني
لو حياته فاضل فيها ثواني
تستاهل انه يلاقي نفسه ويعيش عايش من تاني
كلنا انتي ..لا تتخيلي اننا لم نمر بتلك التجارب المريرة..لكن مهما كانت..الحياة هي فن الممكن وليس المستحيل..قومي وانهضي..الناس قد تتعاطف مع الضعيف يوم او اثنين..لكنها تحترم القوي طول العمر
ReplyDeleteالمحن التي تقربك من ( الله ) أفضل من النعم التي تنسيك ذكر الله
وصفتي الايام بختصار ، بنظرة شوية حزينة بس هي دي الحقيقه و كله بيعدي فرح بيمر كأنه ما حصلش و جرح بيعدي كانه ما جرحش و بننسي و نعيش اللي بعده ، ربنا يسعد أيامك و بنور بصيرتك
ReplyDeleteوصفتي الايام بختصار ، بنظرة شوية حزينة بس هي دي الحقيقه و كله بيعدي فرح بيمر كأنه ما حصلش و جرح بيعدي كانه ما جرحش و بننسي و نعيش اللي بعده ، ربنا يسعد أيامك و بنور بصيرتك
ReplyDelete